Монгол Улсын Их Хурлын 62 дугаар тогтоолоор 2025 оны Долдугаар сарын 05-нд байгуулагдсан “Оюутолгой бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх” үүрэг бүхий Хянан шалгах түр хорооноос нотлох баримтыг шинжлэн судлах сонсголыг 2025 оны 12 дугаар сарын 08-12-ны өдрүүдэд, Төрийн ордонд зохион байгуулах гэж байна. Гэтэл өчигдөр буюу 2025 оны арванхоёрдугаар сарын 04-ний өдөр УИХ-ын гишүүн, Засгийн Газрын Хэрэг Эрхлэх Газрын дарга Сандагийн Бямбацогт “Хянан шалгах түр хороо”-ны хийх гэж буй сонсголын талаар хэвлэлийнхэнд яриа өгөхдөө нэгэн гайхалтай, итгэл алдсан, нууцыг задруулсан мэдэгдлийг хийлээ.
УИХ гишүүн, Засгийн Газрын Хэрэг Эрхлэх Газрын дарга Сандагийн Бямбацогт:
“Хэлэлцээр хийж байгаа энэ цаг үед Оюутолгойн түр хорооноос сонсгол хийж байгаа нь цаг үеэ олоогүй юм болов уу гэж бодож байгаа. Зохимжгүй байна. Хэлэлцээртэй холбоотой Монгол Улсын баримталж байгаа бодлого гадагшаа ил гарчихвал бидэнд сайнаар нөлөө үзүүлэхгүй байх. Тийм болохоор хэлэлцээр дуусч үр дүн гарсны дараа сайн үр дүн гарахгүй бол түүний араас Оюутолгойн түр хороо хуралдаад өшөө илүү Засгийн Газартаа дэмжлэг үзүүлээд явсан бол зөв байсан болов уу. Оюутолгойтой хэлэлцээр хийж буй үед хаалттай мэдээллийг ил болгоод зэрэгцээд нээллтэй сонсгол хийх нь Монгол Улсынхаа эрх ашигт сөргөөр нөлөөлөх боломж байгаа.”
Угтаа бол “Оюутолгойн түр хороо” хөшигний ард, ханцуйндаа наймаалцсаныг Монголын ард түмэнд нээлттэй болгож, өдөр бүр нэмэгдэж байгаа 10 тэрбум өр яаж үүссэн талаар нээлттэй хэлэлцүүлэг зохион байгуулах гэж байхад. Өнөөдөр хэлэлцээрт орж байгаа УИХ-ын гишүүн, Засгийн Газрын Хэрэг Эрхлэх Газрын дарга Сандагийн Бямбацогт хөшигний цаана хаалттайгаар ханцуйндаа наймаалцах гэж зориод байгаагийн цаад санаа юу вэ? Сандагийн Бямбацогт яг юу сэдээд байна? гэх мэтээр Монголын ард түмэн Хууль Зүй, Дотоод хэргийн сайд Баттөмөрийн Энхбаяр шиг хардах эрхтэй.
Мөн Сандагийн Бямбацогтын хэвлэлийнхэнд өгсөн ярилцлагад нэг гайхалтай ойлгомжгүй "ҮГ" бол “Хэлэлцээр дуусч үр дүн гарсны дараа сайн үр дүн гарахгүй бол түүний араас Оюутолгойн түр хороо хуралдаад өшөө илүү Засгийн Газартаа дэмжлэг үзүүлээд явсан бол зөв байсан болов уу” гэсэн нь чих дэлдийлгэж, нүд бүлтийлгөм гайхаш барж байна. Түүний хэлсэн үгнээс “амархан” дүгнэлт хийхэд "Рио Тинто" компанитай хийж буй хэлэлцээр сайн үр дүн авчирахгүй юм байна гэж өөрийн эрхгүй ойлгогдохоор байгаа юм.
УИХ-ын гишүүн Сандагийн Бямбацогт сайдын хэлж байгаагаар бол хэлэлцээрийн дараа сонсгол хийгээд ямар ач холбогдолтой гэж? Ёстой нөгөө “Өнгөрсөн борооны хойноос цув нөмөрсөнтэй” л адил болно. "Нэгэнт галт тэрэг явчихсан" бол ирэх 2032 оныг хүлээхээс өөр аргагүй. Ер нь бол хөшигний ард хэлэлцээрийг амжилтгүй болгох яриа яваад байгаа юм биш байгаадаа гэсэн хардлагыг Сандагийн Бямбацогт сайдын яриа гэрчилж байна.
Угтаа бол Оюутолгойн гэрээг Монгол Улсад түүн дундаа Монголын ард түмэнд өгөөжтэй байлгахын төлөө түр хороо байгуулагдсанаар Сандагийн Бямбацогт мэт нь ханцуйн дотроо, хөшигний ард наймаалцдаг байдлыг халах зорилготой юм.
Гэрээг шинэчилснээр Монголын ард түмэнд өгөөжгүй байгуулсан гэрээг л ил болгож, мэдэх эрхийг нь хангаж, хэлэлцээрийг хийж Монгол Улс түүн дундаа Монголын ард түмэнд өгөх өгөөжийг нэмэгдүүлж эрх ашигт нь нийцүүлэх гээд байгаа.
УИХ гишүүн, Засгийн Газрын Хэрэг Эрхлэх Газрын дарга Сандагийн Бямбацогт хэлэх гэж хэлчихэв үү? Хэл нь хальтраад хэлчихэв үү?
“Үгэн дотор үг, үхэг дотор гиваа" гэж Ард Аюуш кинонд хэлдэг дээ. . Түүний хэвлэлийнхэнд өгсөн ярилцлагын гол агуулга хэнд зориулагдсан байв? Ямартаа ч Монголын ард түмэнд биш байна. Тэр хэнд зориулж Монголын Засгийн газар зээлийн хүүг 6 хувь дээр авиачихад хангалттай юм байна гэсэн санааг цухалзуулав. Уучлаарай Сандагийн Бямбацогт сайдаа та зээлийн жилийн хүүг 6 хувь болгох хүсэлтэй байгаагаа “Нууцыг задруулсан захиа” шиг л "Рио Тинто" компанийханд хэвлэлээр дамжуулаад шивнэчихлээ. Монголын Засгийн газартай гэрээгээ шинэчлээд зээлийн жилийн хүүг 6 хувь болгочиход хангалттай юм байна гэсэн ШИФИ-г өгч, ойлголтыг “Рио Тинто” компанид зориулаад төрүүлчихлээ!!! Та эхнэр, хүүхэд ойр тойрныхоо хэнд ч хэлж болохгүй хэлэлцээрийн хамгийн гол агуулгыг дэлхийгээр нэг цацсан гэдгээ ойлгож байгаа биз!!!!!
Харин "Хэлэх гэж хэлэв үү хэл нь хальтраад хэлчихэв үү" гэдэг сонин байна. Монгол Улсын сайдыг 4 удаа хийсэн цагтаа Батлан Хамгаалахын сайд байсан хүн хэл хальтраад хэлсэн гэвэл ёстой захын нохой дооглож хуцах байх.
Сандагийн Бямбацогт:
Танд (УИХ-ын гишүүн Отгоншарын Батнайрамдалд) нууц мэдээлэл өглөө, мөн хэлэлцээртэй холбоотой нарийн асуудлынхаа мэдээлэл өглөө шүү. Энийг нууцлах ёстой шүү гэдгээ албан бичгэн дээрээ бичээд “Оюутолгойн түр хороо” -руу мөн хяналтын сонсгол хийх Отгоншарын Батнайрамдал гишүүн рүү явуулсан байгаа.
Бүүр гайхмаар нь сэтгүүлчийн манай талаас зээлийн хүүг хичнээн пунктээр бууруулах зорилт тавьж байгаа вэ? гэсэн асуултад Сандагийн Бямбацогт сайд хэлэлцээр хийх ширээний нэг талд сууж буй хүн гэхэд маш хариуцлагагүй хандаж, өөрийнхөө хөзрийг нээлээ. Бүүр тодруулбал “Нэгэн цагт Манжууд Эрдэнэ дайчин хошой Чин ван Ханддоржид хүүгийнх тасадсан толгойг царан дээр тавьж өгсөн шиг” тавиад өгчихлөө. Ай бүү үзэгд ийм юм бас байдаг аа гэж халаглахаар, үүнийхээ төлөө тэрээр одоо хашиж буй албаа өгөх ч багадана.
Сандагийн Бямбацогт:
Одоо зээлийн хүү жилийн 11 хувьтай байгаа ойролцоогоор үүнийг бид 6-н хувьд хүргэх зорилго тавьж байгаа. Анхны саналаар бидний санасан хэмжээнд бууруулах санал ирээгүй байна. Энэ хэлэлцээрийн нууц учраас энийг ил ярих боломжгүй байна. Тийм учраас бид зээлийн хүүг аль болох Монгол Улсын зээлжих зэрэглэл сайжирсантай холбоотойгоор мөн Монгол улсын гадаад дотоодоос босгож байгаа бондын хүү, мөн "Рио Тинто" компанийн өөрийн үнэлгээтэй холбоотойгоор ийм санал тавьж байгаа. Нөхдүүд бидний тавьж байгаа саналын хэмжээнд санал ирээгүй байна. Хэлэлцээрийн талаар тодорхой мэдээлэл өгөөгүй учраас үүнийг цааш нь яримааргүй байна.
Уучлаарай Сандагийн Бямбацогт сайдаа та хамаг юмнийхаа голыг ярьж, нууцыг дэлгэчихлээ. Тэртээ ерээд оны сүүлээр Монгол Улсын 20 дахь Ерөнхий сайд асан Жанлавын Наранцацралт “ОХУ-д явуулсан нэгэн захидал”-аас болж огцорч байсан түүхтэй. Жанлавын Наранцацралтын тэргүүлсэн Засгийн газрын огцрох болсон гол шалтгаан нь ОХУ-ын Засгийн газрын нэгдүгээр орлогч Стейпашинд Монгол Улсын Ерөнхий сайд “Эрдэнэт” үйлдвэрийн хувьчлалын асуудлаар захидал илгээсэнтэй холбоотой.
Гэтэл Ерөнхий сайдыг кабинетаар нь огцруулсан захидлын агуулга өнөөдрийн УИХ гишүүн, Засгийн Газрын Хэрэг Эрхлэх Газрын дарга Сандагийн Бямбацогтын хэлсэн үгний хажууд ёстой 25 дахь Ерөнхий сайд Санжийн Баярын хэлдэгээр “Мальчик” юм.
УИХ гишүүн, Засгийн Газрын Хэрэг Эрхлэх Газрын дарга Сандагийн Бямбацогт та хариуцлагатай алба хашиж буй хүний хувьд хэл минь хальтраад хэлчихлээ гэвэл ард түмнийг доромжилсон болно.
“Мандухай цэцэн хатан” кинон дээр гардаг шиг жаахан хүүхэд ч ойлгох санааг хэн нэгэнд зориулаад “Хэлэх гэж хэлсэн” юм биш үү? Та яг хэний талд байгаад байна!!!
