Инфляци 9 хувьд хүрсэн нь өмнөх сараас 1.2 хувиар өссөн үзүүлэлт. Улсын инфляцад бензин, түлшнээс бусад импортын барааныүнэ 2.9 нэгж хувиар (32.2%), мах, хатуу түлшнээс бусад дотоодын барааны үнэ 4.8 нэгж хувиар (53.3%) тус тус нөлөөлсөн байна.

АНУ-ын Дээд шүүх “TikTok”-ийг хориглох асуудлаар нээлттэй сонсгол явуулна. Энэхүү сонсгол нь “TikTok”-ийн АНУ дахь ирээдүйг шийдэх чухал алхам болох бөгөөд тус аппликэйшнийг 2025 оны нэгдүгээр сарын 19-өөс эхлэн хориглох магадлалтай байна. Хэрэв уг хууль хэрэгжиж эхэлбэл, аппликэйшнийг урьд нь татаж авсан хэрэглэгчид үргэлжлүүлэн ашиглах боломжтой байж магадгүй ч шинэчлэлт хийх эсвэл дахин татаж авах боломжгүй болох аж. АНУ-ын шинээр сонгогдсон Ерөнхийлөгч Дональд Трамп “TikTok”-ийн үйл ажиллагааг хэвийн үргэлжлүүлэхийн зэрэгцээ аюулгүй байдлын асуудлыг шийдвэрлэх улс төрийн шийдэл олохыг уриалаад буй.

Гренланд арлын эдийн засаг, стратегийн ач холбогдол өсөж буйтай шууд холбоотойгоор Дональд Трампын энэ арлын талаарх сонирхол улам бүр нэмэгдэж байна. 2.1 сая гаруй км² газар нутгийг хамардаг Гренланд нь (Монголын газар нутгаас 1.3 дахин том) ховор метал, газрын тос, байгалийн хийн асар их нөөцтэй. Түүнчлэн Арктикийн усан зам болон цэргийн чухал бүсүүдийн ойр байрлал нь дэлхийн хүчирхэг орнуудын анхаарлыг хэдийнээс татаж иржээ.

Хүүхдүүдийн 5-6 шүдийг Шүд, эрүү нүүрний төвд үнэгүй эмчилнэ. 0-6 насны хүүхдийн таван шүд, 7-18 настнуудын 6 шүд, жирэмсний хяналтад байгаа иргэний бүх шүдийг Эрүүл мэндийн даатгалаар үнэ төлбөргүй эмчилнэ. Харин 18-аас дээш насныхны шүдийг төлбөртэй эмчилнэ

MIT бага, дунд орлоготой оюутны сургалтын төлбөрийг тэглэлээ. MIT нь дээд боловсролыг илүү хүртээмжтэй болгох бодлогын хүрээнд өрхийн жилийн орлого нь 200,000 ам.доллароос бага бакалаврын оюутнуудын сургалтын төлбөрийг хөнгөлж, үнэгүй болгожээ. Харин оюутны өрхийн орлого 100,000 ам.доллароос бага тохиолдолд байр, хоол, хураамж, номын зардал, хувийн зардал зэргийг мөн MIT-ийн зүгээс бүрэн хариуцах аж.

Шахмал түлшний түүхий эдийг ирэх гуравдугаар сараас солино. “Энержи ресурс” ХХК-ийн уурхайгаас авдаг байсан нунтаг нүүрсийг одоо “Эрдэнэс Тавантолгой”-н “0” давхаргын баяжмалаар сольж шахмал түлш үйлдвэрлэнэ.

Dior vs Cartier: Жисүгийн төлөөх өрсөлдөөн: Дэлхийн тансаг зэрэглэлийн томоохон брэндүүд Өмнөд Солонгосын дуучин Жисүгийн нөлөөг хадгалж үлдэхийн тулд ширүүн тэмцэл өрнүүлж байна. “Richemont Group” буюу “Cartier” брэндийн эзэмшигч компани Жисүг нүүр царайгаа болгохын тулд “Dior”-ийн санал болгосон мөнгөн дүнгээс хоёр дахин ихийг санал болгосноо мэдэгдээд байна. Жисүгийн Z үеийнхэнд үзүүлэх нөлөө дэлхийн брэндүүдийг гайхшируулаад байна. Тэрбээр “Dior” брэндийн нүүр царай болж, ажиллаж эхэлснээс хойш тус брэндийн Z үеийн борлуулалт 400 хувиар өсчээ.

Марк Закерберг Илон Маскийн жишгийг даган “Facebook”-т үг хэлэх эрх чөлөөг дэмжих шинэ бодлого хэрэгжүүлнэ. Марк Закерберг одоо хэрэгжиж буй баримт шалгах системийг халж, хэрэглэгчид мэдээллийн үнэн зөвийг хамтдаа баталгаажуулдаг хяналтын шинэ систем нэвтрүүлэхээр төлөвлөжээ. Түүний хэлснээр, АНУ-ын Ерөнхийлөгчийн сонгуулийн үр дүн үг хэлэх эрх чөлөөг нэн тэргүүнд тавих ёстойг сануулсан чухал эргэлтийн үе болсон тул “Meta” платформуудынхаа бодлогыг зөөлрүүлж, илүү хялбаршуулан, хэрэглэгчдийн итгэлийг сэргээхийг зорьж байгаа аж. Түүнчлэн “Facebook”, “Instagram” платформ дахь цагаачлал, жендэр зэрэг улс төрийн холбогдолтой эмзэг сэдвийн хязгаарлалтыг цуцлахаа мэдэгдсэн байна.

Хятад литийн нөөцөөрөө дэлхийд хоёрт орж байна. тус улсын литийн нөөц дэлхийн нийт нөөцийн 6 хувиас 16.5 хувь болж нэмэгдэж, чансаагаараа зургаадугаар байраас хоёрдугаар байрт дэвшсэн байна. Учир нь Хятадын баруун бүс нутаг дэлхийн хэмжээний сподумен төрлийн литийн бүсийг илрүүлсэн байна. Чинхай-Сизан өндөрлөгийн давстай нууруудаас олдсон литийн нөөц ч мөн мэдэгдэхүйц нэмэгдэж, тус улс дэлхийн гурав дахь том давст нуурын литийн нөөцийн бааз болж байна.

Канадын Ерөнхий сайд Жастин Трюдо албан тушаалааcаа огцрохоо мэдэгдлээ. Жастин Трюдо ирэх аравдугаар сарын сүүлчээр болох бүх нийтийн сонгуулиар шинэ удирдагч тодортол Ерөнхий сайдын албан тушаалаа үргэлжлүүлэн хаших юм. 2015 оноос хойш Ерөнхий сайдаар ажиллаж буй Трюдогийн нэр хүнд сүүлийн саруудад огцом унаж, Либерал намын олон нийтийн дэмжлэг түүхэн доод түвшинд хүрсэн нь огцрох гол шалтгаан болсон байна. Сөрөг хүчний Консерватив намын дарга Пьер Пуалев кампанит ажлаа эрчимжүүлж, нам нь одоогоор 20 гаруй хувийн саналаар бүх нийтийн сонгуулийн өмнөх санал асуулгыг тэргүүлж байна.