Канадын Ерөнхий сайд Жастин Трюдо албан тушаалааcаа огцрохоо мэдэгдлээ. Жастин Трюдо ирэх аравдугаар сарын сүүлчээр болох бүх нийтийн сонгуулиар шинэ удирдагч тодортол Ерөнхий сайдын албан тушаалаа үргэлжлүүлэн хаших юм. 2015 оноос хойш Ерөнхий сайдаар ажиллаж буй Трюдогийн нэр хүнд сүүлийн саруудад огцом унаж, Либерал намын олон нийтийн дэмжлэг түүхэн доод түвшинд хүрсэн нь огцрох гол шалтгаан болсон байна. Сөрөг хүчний Консерватив намын дарга Пьер Пуалев кампанит ажлаа эрчимжүүлж, нам нь одоогоор 20 гаруй хувийн саналаар бүх нийтийн сонгуулийн өмнөх санал асуулгыг тэргүүлж байна.

Дэлгэцийн цагаа багасгахын тулд "ухаалаг биш" утас ашиглах тренд дэлгэрч байна. Утсаар ярьж, мессеж бичих л зориулалттай энгийн утасны борлуулалт 2019 онд 400 сая байсан бол энэ тоо 2024 онд ойролцоогоор 4 дахин их болжээ. Эрэлт хэрэгцээ нэмэгдэж байгааг анзаарсан гар утас үйлдвэрлэгчид ч энгийн утсыг дахин үйлдвэрлэж байна.

Microsoft 2025 онд дата төв байгуулахад 80 тэрбум ам.долларыг зарцуулна. Microsoft OpenAI компанид 13 тэрбум ам.долларын хөрөнгө оруулалт хийсэн бөгөөд тус стартапыг үүлэн дэд бүтцээр хангаж, хиймэл оюуны загваруудыг Windows, Teams болон бусад бүтээгдэхүүнд нэгтгээд байна. Microsoft компанийн Azure болон бусад үүлэн үйлчилгээнээс олсон орлого санхүүгийн эхний улиралд 33 хувиар өсчээ.

Хааны бэр шинэ шоу нэвтрүүлэг гаргахаар болжээ. Их Британийн хаан III Чарльзийн бэр, Сексексийн гүнгийн авхай Меган Маркл "Netflix"-тэй хамтарч, шинэ шоу нэвтрүүлэг гаргаснаа зарлалаа. Уг шоу нь практик аргачлал, илэн далангүй яриаг хослуулсан амьдралын хэв маягийн тухай юм байна. "With Love, Meghan" шоу нь нэгдүгээр сарын 15-нд нээлтээ хийх бөгөөд жүжигчин Минди Калинг, "Suits" киноны од асан Абигаил Спенсер зэрэг алдартнуудыг оролцуулсан 30 минутын найман ангитай байх аж.

"Тесла" компанийн борлуулалт 2023 онтой харьцуулахад 1.1 хувиар буурсан үзүүлэлттэй гарлаа. Энэ нь есөн жилийн дараах анхны бууралт юм. "Тесла"-ийн Остин, Техас дахь салбарууд сүүлийн хоёр сарын хугацаанд 495,570 автомашин борлуулснаар бүтэн жилийн нийлүүлэлт нь 1.79 сая хүрчээ. Гэвч энэ нь 2023 оны 1.81 сая борлуулалтаас 1.1 хувиар буурсан үзүүлэлт юм. Ерөнхийлөгчийн сонгуулийн ялагчтай ойр харилцаатай байх нь Элон Маскийн компаниудад нэмэртэй гэж таамаглаж байсан ч тийм зүйл болсонгүй.

X үеийнхэн зээлийн картынхаа хязгаарыг тултал ашигладаг. X үеийнхэн буюу 1965-1980 оны хооронд төрсөн хүмүүс зээлийн картынхаа дээд хязгаарыг тултал ашиглаж байгаа нь сүүлд явуулсан судалгааны дүнгээр тодорхой болжээ. АНУ-ын Bankrate компанийн зээлийн карт эзэмшигч 3000 гаруй хүний дунд хийсэн судалгаагаар тавны нэг буюу 20 хувь нь зээлийн картын хязгаарыг тултал нь ашиглаж байгааг тогтоожээ. 2023 оны дөрөвдүгээр улирлын байдлаар америкчуудын зээлийн картын өр 1.13 их наяд ам.долларт хүрч, өмнөх улирлаас 4.6 хувиар өссөн үзүүлэлттэй байна.

Монгол Оросын хилийн Цагааннуур, Ханх, Ульхан боомтууд 1 дүгээр сарын 1-8-ны өдрүүдэд, БНХАУ-ын талаас тус улсын Хаврын баяр буюу билгийн тооллын шинийн 1, 2, 3-ны өдрүүдэд Тэс, Арцсуурь боомтууд 2025 оны 1 дүгээр сарын 1-4-ны өдрүүдэд түр хаана.

“Эрдэнэт үйлдвэр” ТӨҮГ-ын зэсийн баяжмалыг дөрөвдүгээр сараас эхлэн биржээр арилжиж, нийт 6000 тонныг 40.5 тэрбум төгрөгөөр худалдсан байна. Анх арилжаа эхлэхэд 30 мянган тонн зэсийн баяжмал биржээр арилжихаар төлөвлөж байсан ч II улирлаас хойш биржээр захиалга хийгдээгүйг “Эрдэнэт үйлдвэр” ТӨҮГ-аас мэдээлж байв. Харин 2025 онд 60 мянган тонн зэсийн баяжмал биржээр арилжихаар бэлтгэж байна.

Тайландын Бангкок хотоос БНСУ руу ниссэн "Jeju Air" компанийн онгоц 2024.12.29-ний өглөө 09.50 цагийн орчимд "Муан" нисэх онгоцны буудалд газардах үедээ осолдсон харамсалтай осол гарсан. Үүнтэй холбоотойгоор БНСУ-ын Ерөнхийлөгчийн үүрэг гүйцэтгэгч, Сангийн сайд Чой Сан Мок улс даяар өнөөдрөөс эхлэн /2024.12.30/ гашуудал зарлалаа. Тэрээр ослын газарт ирж мэдэгдэл хийн, амиа алдагсдын ар гэрийнхэнд эмгэнэл илэрхийлжээ. Гашуудал долоо хоногийн хугацаанд үргэлжилж, ирэх бямба гарагийн шөнө /2024.01.04/ дуусах юм.

АНУ-ын Ерөнхийлөгчөөр сонгогдсон Дональд Трамп TikTok-ийг хориглох шийдвэрийг хойшлуулахыг АНУ-ын Дээд шүүхээс хүсчээ. Баасан гарагт түүний өмгөөлөгч шүүхэд мэдэгдэл гаргаж, Трамп TikTok-ийг хориглохыг эсэргүүцэж байгаагаа илэрхийлээд уг асуудлыг улс төрийн замаар шийдвэрлэх сонирхолтой гэдгээ мэдэгджээ. Ирэх оны нэгдүгээр сарын 10-нд АНУ-ын шүүх TikTok-ийн Хятадын эзэмшигч ByteDance компанийг Америкийн компанид худалдахаар шаардсан хуулийн талаар хэлэлцэнэ. Хэрэв заасан хугацаанд зарахгүй бол TikTok-ийг нэгдүгээр сарын 19-ний өдөр хориглох асуудал яригдаж байна. Энэ нь Трамп ерөнхийлөгчийн албан тушаалаа авахын өмнөх өдөр тохиож буй юм.