



















Украины Ерөнхийлөгч Володимир Зеленский Оростой шууд гал зогсоох хэлэлцээр хийх боломжийг үгүйсгэлээ. Гурван жилийн турш илүү том, хүчирхэг дайсантай тулалдаж буй ч тэр бууж өгөх бодолгүй хэвээр байна. Ням гарагт Лондонд болсон уулзалтад Европын удирдагчдын дэмжлэгийг хүлээн авч, урамшсан Зеленский барууны улсууд хангалттай аюулгүй байдлын баталгаа өгөх хүртэл дайнаа үргэлжлүүлэхээ мэдэгдэв. Тэрээр “Хэрэв дайн дуусах нөхцөл бүрдээгүй, аюулгүй байдлын баталгаа байхгүй бол хэн ч гал зогсоох хэлэлцээрийг хянаж чадахгүй” гэж Financial Times-т ярьжээ.
Украины удирдагчийн үзэж буйгаар, Орос өмнө нь гал зогсоох гэрээ байгуулсан ч удаа дараа довтолж байсан тул Киев өөрийгөө хамгаалах хангалттай баталгаа бүрдүүлж байж зэвсгээ буулгах ёстой гэдгийг хэлсэн байна. “Бидэнд аюулгүй байдлын баталгаа хэрэгтэй. Одоогийн байгаа байдал дууссаны дараа дахин ижил зүйл болохгүй гэсэн итгэл байх ёстой” хэмээн Зеленский хэлсэн.
АНУ-ын Ерөнхийлөгч Дональд Трамп өмнөх хэлэлцээрүүдийг Жо Байден, Барак Обама зэрэг "Сул" ерөнхийлөгчдийн үед зөрчсөн гэж мэдэгдсэн бөгөөд гал зогсоох гэрээ нь зөвхөн илүү өргөн хүрээтэй энхтайвны тохиролцооны эхний алхам байх ёстой гэж үзэж байна.
Зеленский Францын Ерөнхийлөгч Эммануэль Макроны санаачилсан "Нэг сарын хугацаатай агаар, далай, эрчим хүчний дэд бүтцэд халдахгүй байх" түр гал зогсоох төлөвлөгөөг мэдсэн гэдгээ хэлсэн ч, энэ саналыг хүлээн авах эсэх талаар тайлбар өгөхөөс татгалзжээ.
Ням гарагт Лондонд болсон дээд хэмжээний уулзалтын үеэр Их Британийн Ерөнхий сайд Сэр Киир Стармер болон Ерөнхийлөгч Макрон Зеленскийтэй энхийн хэлэлцээр байгуулах схем боловсруулах хүсэлтэй байгаагаа илэрхийлж, энэ саналаа Вашингтонд танилцуулахаар тохиролцсон юм.
Гэхдээ Лондонгийн уулзалт олон орны удирдагчдыг нэг дор цуглуулсан хэдий ч Их Британи, Францын санал болгосон Европын энхийг сахиулах хүчин байгуулах төлөвлөгөөг бусад орнууд дэмжсэнгүй. Ерөнхий сайд Стармер Их Британиас Украинд цэргийн болон агаарын хүч илгээхэд бэлэн байгаагаа мэдэгдсэн боловч ийм ажиллагаа АНУ-ын дэмжлэгтэй байх ёстой гэж үзэж байгаа. Гэхдээ Вашингтон үүнийг дэлхийн хамгийн том цөмийн гүрнүүдийн шууд мөргөлдөөнийг өдөөж болзошгүй хэмээн эсэргүүцэж байгаа аж.
Зеленский АНУ-д хийсэн айлчлалынхаа хүрээнд ашигт малтмалын хөрөнгө оруулалтын гэрээнд гарын үсэг зурахаар төлөвлөж байсан ч, өнгөрсөн амралтын өдрүүдэд Вашингтоноос яаралтай буцсан тул гэрээ байгуулагдаагүй.
Гэхдээ энэ санал одоо ч хүчин төгөлдөр эсэх нь тодорхойгүй байгаа. АНУ-ын Сангийн сайд Скотт Бессент "CBS" телевизэд өгсөн ярилцлагадаа энэ гэрээ энхтайвны хэлэлцээр байгуулах эхний алхам байх ёстой байсан гэж мэдэгдэж, хэрэв Зеленский “Дайныг үргэлжлүүлэхийг хүсэж байвал” уг гэрээ утгагүй болно гэжээ. Ерөнхийлөгч Трамп ч Украины удирдагч энхийн хэлэлцээр байгуулах ёстой гэж үзэж байна.
Зеленский Вашингтонд хийсэн уулзалтын дараа эх орондоо эргэн очих үед түүний засаглал хэр тогтвортой байх нь тодорхойгүй хэвээр байгаа. Цагаан ордны уулзалтын үеэр гаргасан үйлдлүүд нь дотооддоо болон гадаадад ч шүүмжлэл дагуулсан бөгөөд Европын хэд хэдэн улс орны удирдагчид түүнд АНУ-ын Ерөнхийлөгчтэй харилцаагаа сайжруулахыг зөвлөжээ. Гэвч Зеленский Трампаас уучлалт гуйхгүй гэж зөрүүдэлсэн хэвээр байна.











