Даваа гарагт Иран улс АНУ болон Израильтай хийж буй дайнаа түр хугацаанд зогсоох бус, харин урт хугацаанд бүрмөсөн дуусгахыг хүсэж байгаагаа илэрхийллээ.
Ормузын хоолойг дахин нээх шахалтыг Иран улс хүлээж авахгүй хэмээн мэдэгдсэн байна. Үүний зэрэгцээ АНУ-ын Ерөнхийлөгч Дональд Трампын санал болгосон мягмар гарагийн орой хүртэл тохиролцоонд (Улаанбаатарын цагаар Лхагва гарагийн өглөөний 08:00) хүрэх эцсийн хугацааг биелүүлэхгүй бол тус улс “үгүй болно” гэж анхааруулсан анхааруулгыг үл тоож буй бололтой.
Пакистаны зуучлалаар АНУ-ын саналд хариу өгөхдөө Тегеран гал зогсоох саналыг няцааж, дайныг бүрмөсөн зогсоох шаардлагатай гэж мэдэгдсэн.
Уг мэдэгдлийг Ираны албан ёсны төрийн мэдээллийн агентлаг IRNA мэдээлсэн юм.
Тус агентлагийн мэдээлснээр АНУ-ын саналд өгч буй Ираны хариу нь 10 заалтаас бүрдэж буй аж. Үүнд бүс нутгийн мөргөлдөөнийг зогсоох, Ормузын хоолойгоор аюулгүй нэвтрэх журам боловсруулах, хориг арга хэмжээг цуцлах, сэргээн босголтын асуудлыг шийдвэрлэх зэрэг зүйл, заалт багтжээ.
"Пакистаны зуучилсан дайныг дуусгах АНУ-ын төлөвлөгөөнд нэн даруй гал зогсоох, гал зогсоосны дараа 15–20 хоногийн дотор илүү өргөн хүрээтэй энхийн хэлэлцээр байгуулах зэрэг хэлэлцээ хийх санал багтсан байсан" гэж уг саналыг мэдэх эх сурвалж хэвлэлд мэдээлсэн.
Ормузын хоолойг нээх асуудлаар мягмар гарагийн оройн 8 цаг хүртэл (АНУ цагаар) тохиролцоонд хүрэхгүй бол Тегеранд “Тамыг үзүүлнэ” гэж заналхийлж байсан Ерөнхийлөгч Дональд Трамп Ираны энэхүү хариуг няцааж, өөрийн тогтоосон хугацаа эцсийнх гэдгийг мэдэгдлээ.
Хэвлэлийн бага хурлын үеэр Дональл Трамп Ираныг “Нэг шөнийн дотор үнсэн товрого болгож чадна, тэр шөнө магадгүй маргааш байж болно” хэмээн урд шөнө хийсэн мэдэгдэлдээ дурдсан.
Тэрээр өмнө нь Ираны цахилгаан станцууд болон гүүрүүдийг устгана гэж амласан юм. Мөн тэрээр ийм үйлдэл нь дайны гэмт хэрэг болох эсэх, эсвэл Ираны 93 сая иргэнийг эсэргүүцэлд хүргэх эсэх талаар үл тоомсорлож байгаа бөгөөд Тегерантай тохиролцоонд хүрэхгүй бол лхагва гарагийн шөнө дунд гэхэд “Ираны бүх гүүрийг устгах” мөн “Ираны цахилгаан станцуудыг ажиллагаагүй болгож, дэлбэлэн ахин хэзээ ч ашиглагдахгүй болгоно” гэж мэдэгдэж байсан.
Үүний хариуд Ираны зэвсэгт хүчний нэгдсэн командлал Дональд Трампыг “Төөрөлдсөн” хэмээн нэрлээд, түүний мэдэгдлийг “Бүдүүлэг, бардам, үндэслэлгүй заналхийлэл” гэж тодорхойлсон тухай төрийн телевизээр дамжуулан хийсэн мэдэгдэлд дурджээ.
Ерөнхийлөгч Дональд Трампын сүүлийн мэдэгдлийн дараа Ираны спортын дэд сайд Алиреза Рахими уран бүтээлчид болон тамирчдыг мягмар гарагт улс даяар цахилгаан станцуудын дэргэд хүнэн гинж үүсгэж дэд бүтцээ хамгаалахыг уриалж,
“Иргэний дэд бүтцэд халдах нь дайны гэмт хэрэг гэдгийг бид гар гараасаа хөтлөн зогсож харуулна”
гэж өөрийн нийгмийн сүлжээ X дээр бичсэн байна.
Иранаас НҮБ дахь төлөөлөгч өчигдөр мэдэгдэл гаргаж, Дональд Трампын нийгмийн сүлжээнд хийсэн бичлэг нь Ираны дэд бүтцэд цохилт өгөхийг анхааруулж байгаа нь
Терроризмыг шууд өдөөсөн, мөн олон улсын эрх зүйг үл хүндэтгэсэн, дайны гэмт хэрэг үйлдэх санаархлын тод нотолгоо.
гэж буруутгав.
Бие даасан шинжээчид ч мөн цахилгаан станц, гүүр зэрэг иргэний дэд бүтцэд халдах нь дайны гэмт хэрэгт тооцогдоно гэж үзэж байгаа аж.
Харин Дональд Трамп Ираны ард иргэд “Эрх чөлөөнийхөө төлөө ийм зовлонг тэвчихэд бэлэн” гэж мэдэгдэж, АНУ-д Ираныг бөмбөгдөхийг хүссэн хүсэлт мессежээр ирүүлсэн гэж хэлсэн байна.
АНУ болон Израиль хоёрдугаар сарын 28-нд довтолсны дараа Иран дэлхийн газрын тос, байгалийн хийн нийлүүлэлтийн ойролцоогоор тавны нэгийг дамжуулдаг Ормузын хоолойг бодитоор хаасан бөгөөд энэ нь дэлхийн эдийн засагт хүчтэй нөлөө үзүүлэх стратегийн хөшүүрэг болсон тул Тегеран үүнийг амархан тавьж өгөх сонирхолгүй байгаа юм.
Даваа гарагийн эхээр Тегеран хот дахь шилдэг шинжлэх ухааны байгууллагуудын нэг болох Шарифын Технологийн их сургуульд АНУ, Израилийн хамтарсан довтолгоо болсон гэж мэдэгдсэн. Тус улсын WANA агентлагийн мэдээлснээр хиймэл оюуны дата төв болон бусад байгууламжууд гэмтсэн гэсэн байна.
Ираны Гадаад хэргийн сайд Аббас Аракчи нийгмийн сүлжээ X-д
Довтлогчид бидний хүчийг харах болно.
гэж мэдэгдсэн бол тус улсын шинжлэх ухааны сайд дайны хугацаанд 30 орчим их сургуульд АНУ болон Израилийг халдсан гэж буруутгасан байна.
Хэвлэлийн бага хурлын үеэр Дональд Трамп болон Батлан хамгаалахын сайд Пит Хегсет нар баасан гарагт буудуулж унасан онгоцны нисгэгчийг Иранаас амжилттай аварсан ажиллагааг сайшаасан бөгөөд Хегсет уг ажиллагааг Христийн шашны утгаар тайлбарлаж, Есүс Христийн ахин төрөлттэй зүйрлэсэн.
Энэхүү аврах ажиллагаа нь бараг зургаан долоо хоног үргэлжилж буй дайны дэлхийн эдийн засагт үзүүлж буй нөлөө, тухайлбал түлшний үнийн огцом өсөлтийн талаархи санаа зовнилын дунд явагдсан бөгөөд мөн Трампын нэр хүндэд сөргөөр нөлөөлж, Бүгд Найрамдах намын хувьд ирэх арваннэгдүгээр сард болох дунд хугацааны сонгуулийн өмнөх түгшүүрийг нэмэгдүүлжээ.
Даваа гарагт бүс нутгийн хэмжээнд агаарын цохилтууд үргэлжилсэн юм. Батлан хамгаалах сайд Хегсетийн хэлснээр тухайн өдөр дайны эхнээс хойших хамгийн олон цохилт хийгдсэн бол мягмар гарагт бүр илүү их довтолгоо хийгдэх төлөвтэй байгаа аж.
Израилийн арми өнөөдөр өглөө эрт мэдэгдэхдээ Тегеран болон Ираны бусад бүс нутагт төрийн дэд бүтцүүдийг устгасан гээд нэмэлт мэдээлэл удахгүй өгнө гэжээ.
Түүнчлэн Ираны нийслэл Тегераны орон сууцны бүсэд мягмар гарагт цохилт өгч, аврагчид нуранги дороос хүмүүсийг хайж байсан тухай Ираны "Улаан хавирган сар" байгууллага мэдээлсэн байна.
Израилийн Батлан хамгаалахын сайд Израиль Кац Ираны дэд бүтцийг устгаж, удирдагчдыг нь “Нэг нэгээр нь устгана” гэж заналхийлсэн бол Ерөнхий сайд Беньямин Нетаньяху өмнөд Иран дахь нефть-химийн байгууламжид өгсөн цохилтыг Ираны Хувьсгалт гвардын “мөнгөний машиныг” устгах ажиллагааны нэг хэсэг байсан гэж мэдэгдсэн юм.
Иран Израильтай холбоотой усан онгоц руу довтолж, мөн хөрш орнууд руу үргэлжлүүлэн цохилт өгч байгаагаараа Дональд Трампын удаа дараагийн “Пуужин, дроны чадавхийг нь устгасан” гэх мэдэгдлийг үл харгалзан сөрөн тэмцэх чадвартай хэвээр байгаагаа харуулж байна.
Израиль Даваа гарагт пуужингийн хүчтэй довтолгоонд өртөж, улс даяар дохиолол, агаарын хамгаалалтын дэлбэрэлтүүд тасралтгүй сонсогдож байсан бөгөөд мягмар гарагийн өглөө эрт Израилийн арми Иранаас пуужин харвасан болохыг илрүүлж, “Аюулыг таслан зогсоохоор хамгаалалтын системүүд ажиллаж байна” гэж мэдэгдсэн.
Үүнтэй зэрэгцэн Арабын Нэгдсэн Эмират, Саудын Араб, Бахрейн улсууд мягмар гарагт олон нийтийн аюулгүй байдлын анхааруулга гаргаад байна.
АНЭУ агаарын хамгаалалтын системүүд нь пуужингийн аюултай тэмцэж байна гэж мэдэгдсэн бол Саудын Арабын Зүүн бүсэд сэрэмжлүүлэх дохио ажиллуулж, Бахрейн иргэдээ дохиолол дуугарсны дараа хамгийн ойрын аюулгүй газарт очихыг уриалжээ.
Эцэст нь, Ираны дайны улмаас Ойрхи Дорнод даяар олон мянган хүн амь үрэгдсэн бөгөөд АНУ-д төвтэй хүний эрхийн HRANA байгууллагын мэдээлснээр зөвхөн Иранд 3'546 хүн, Ливанд бараг 1'500 хүн амиа алдаад байгаа аж.
.jpg&w=3840&q=75)
