УИХ дахь МАН-ын гишүүн Хүрэлбаатарын Баасанжаргал “Ийм сөрөг хүчин гэж байдаг юм уу? Хэрвээ өнөөдөр сөрөг хүчин, сөрөг хүчин шиг байсан бол Парламент ийм байдалд орохгүй байсан. Та нар сөрөг хүчин биш, та нар эрх ашгийн нэгдэл, хуйвалдаан” гэж УИХ дахь АН-ынханд хандаж хэлэхэд ард нь суусан МАН-ынхан АН-ынхныг даапаалан алга ташсан.
АН-ынхан ингэж даапаалуулж суух заяатай нам уу?
Хүрэлбаатарын Баасанжаргал гишүүний хэлснээр АН-ынхан ийм л хувь заяатай бололтой. Учир нь АН-ын дарга Одонгийн Цогтгэрэлийг намынхнаа удирдаж чадахгүй байгаа тул ийм басамжил, егөөдөл гарах нь зүй. “Мундсыг нь умдастай нь эргүүлчих гох дэгээнээс гогдуулчихсан” буюу бүрэн хянуулж, хяналтанд нь орж гарах гарцгүй болсон гишүүдээ өөрөө биш эсрэг намаараа удирдуулж суух шиг гунигт түүх намын даргад үгүй. УИХ дахь МАН-ынханд нам гогдуулж тас атгуулсан гишүүдтэйгээ хариуцлага ярьж чадахгүй бол АН-ын УИХ дахь бүлгийн дарга, АН-ын дарга гэх цол гуншинг нь 172 мянган гишүүн нь Одонгийн Цогтгэрэлээс асуух учиртай болно.
АН-ынхан сөрөг хүчин биш МАН-ын 38-ийн бүлгийн Ногоон, Улаан лаазны дохиураар хөдөлдөг утсан хүүхэлдэй болсныг нийтээрээ ил тод харж байна. Эрх баригчдыг “ЭРЛЭГ”-т явуулах учиртай сөрөг хүчин нь Гомбожавын Занданшатарын Засгийн газрыг огцруулахгүй гээд УИХ-ын чуулганд суухгүй бултсан. Бултсан хүмүүс нь өнөөдөр шагналаа авч өөрийнхөө тойрогт санхүүжилт авчихлаа гэж МАН-ын 30-ийн бүлгийнхэн улайм цайм хэлээд гэрчлээд байх.
Хүрэлбаатарын Баасанжаргал гишүүний хэлсэнчлэн “Та нар сөрөг хүчин шиг сөрөг хүчин биш” хэмээн даапаалуулахад хэн буруутай вэ? Яах аргагүй өнөөдөр тус намыг удирдаж, эрх мэдлийнхээ хүрээнд УИХ-ын Бүлгийн дарга гэсэн давхар дээл нөмөрсөн Одонгийн Цогтгэрэл хамгийн их буруутай. Түүний араас “Сэндэр охин” хэмээх ардын дууны “Арван ембүү харахаараа Алгаа тосдог аав уу даа хө” гэдэг үгийн бодит илэрхийлэл болсон УИХ дахь АН-ын зарим гишүүд хамтдаа буруутайд тооцогдох учиртай.
Ерөнхий сайд Гомбожавын Занданшатарыг огцруулаад өгөөч гээд сөрөг хүчин бүрийн хүсдэг, хүсэмжит саналыг эрх баригчдын талаас найр тавих ийм түүхэн боломж дахин олдохгүй.
Гэтэл УИХ-ын чуулганыг тасалсан нэрийдлээр зугтсан АН-ын гишүүн Жамбалын Батсуурь, Хөххүүгийн Болормаа, Амгаланбаатарын Ганбаатар, Пүрэвбаатарын Мөнхтулга, Бадамждоржийн Пунсалмаа, Равжихийн Эрдэнэбүрэн, Очирбатын Амгаланбаатар нар болон аравдугаар сарын 16-нд шөнөжин дуудуулж, аравдугаар сарын 17-ны өглөө аргагүйн эрхэнд ирсэн Норовын Алтанхуяг, Дашдондогийн Ганбаатар (Бидон Ганбаа), Жудагийн Баярмаа (Баян Бажаа) нар байлаа. Харин Саруулсайханы Цэнгүүн, Цэндийн Баатархүү нар эмнэлгийн чөлөөтэй гэсэн гэнэ лээ.
Угтаа бол АН-ын дарга Одонгийн Цогтгэрэл өөрөө УИХ-дахь бүлгээ удирдаж чадахгүй бол удирдах хэн нэгнийг даргаар томилох, бүлгийнхээ 42 гишүүнийг удирдаад эрх баригчдын Засгийн газрыг унагаж чадахгүй, ийм боломжийг улстөрдөө ашиглаж чадахгүй юм бол түүнд АН-ын дарга байх чадамж алга. УИХ дахь АН-ын 42-хон гишүүнээ удирдаж чадахгүй түүнийг задгай тоглолттой, ил тод нээлттэй “үзэлцдэг” 172 мянган гишүүнтэй АН-ын даргыг цааашид хийсээр байна гэвэл захын нохой ч ноолж шоглохоор байна.
Хэдэн жил тамга, даргын зовлондоо туйлдсан АН-ыг УИХ-д 42 суудалтай болгож, УИХ дахь бүлгийн гишүүдээ нэгэн зүгт чиглүүлж, Засгийн Газарт хамтарч, төгсгөлд нь танхимын тэргүүн Лувсаннамсрайн Оюун-Эрдэнийн Засгийн газрыг унагасан Лувсаннямын Гантөмөр дарга шигээ биш юмаа гэхэд талд нь ч болтугай хүрэх хэмжээний СӨРӨГ ХҮЧНИЙ ажлаа хий. ҮГ өмнө нь “АН-ын дарга Одонгийн Цогтгэрэлээ Намбарын Энхбаяраас СУРАЛЦ” хэмээн сануулж байснаа ч дахин сануулья.
Одонгийн Цогтгэрэл хэмээх давхар дээлтэй дарга нь Ерөнхий сайд Гомбожавын Занданшатарын Засгийн Газрыг огцруулахгүй гээд зугтсан Очирбатын Амгаланбаатар, Жамбалын Батсуурь, Хөххүүгийн Болормаа, Амгаланбаатарын Ганбаатар, Пүрэвбаатарын Мөнхтулга, Бадамждоржийн Пунсалмаа, Равжихийн Эрдэнэбүрэн, Норовын Алтанхуяг, Дашдондогийн Ганбаатар (Бидон Ганбаа), Жудагийн Баярмаа (Баян Бажаа) нартаа хариуцлага тооцож чадах уу?
Бүүр бүлгээрээ хэлэлцээд Гомбожавын Занданшатарыг огцруулах дээр “3-А”-тай буюу заавал биелүүлэх шийдвэр гаргасан ч бүлгийн гаргасан шийдвэрээ нулимсан том толгойтой, хувиа хичээсэн, өнөөдрийн ашиг горьдсон гишүүдтэйгээ хэрхэн хариуцлага тооцох вэ!
Эсвэл ийм боломжийг ашиглаж 2027, 2028 оны сонгуулийн боломжоо тэлэх байтал таг суусаар, эрх баригчидтай ханцуйндаа тохирсоор байгаа Одонгийн Цогтгэрэлдээ АН-ынхан нь хариуцлага тооцох уу?
Хариуцлага тооцохгүй бол ардчилсан намын нэртэй ч Ардын Намын гал хамгаалагч болсон гишүүд чинь увай ч үгүй, улстөр ч үгүй болгож байна АН-ыг!!!
Тухайлбал УИХ-ын гишүүн Жудагийн Баярмаа:
“Шөнөжингөө элдвээр дуудаад эсвэл гарч хэвлэлийн бага хурал хийгээд ирээгүй хүмүүсийг өчнөөн цоллосон ш дээ. Мэссэж ч ирсэн ш дээ. Ална шүү П минь ирж хуралдаа орооч ээ. Шөнөжингөө ийм мессеж ирсэн шүү. Бараг дүүжилнэ шүү гэсэн мэссэж шөнөжин ирсэн. Өөрөөр хэлбэл Үндсэн хууль зөрчүүлэхийг дарамталсан. Одоо надад энэ мэссэж нь байгаа. Тагнуулд өгмөөр юм билээ 80-тай утаснаас дүүжилнэ шүү наад хоёрыгоо огцруул гээд... Ийм их дарамт дунд бид ирсэн шүү”
гэж хэлснээрээ аравдугаар сарын 17-нд ирж ирцэндээ орсон байдаг. Магадгүй хамаа намаагүй, бодлогогүй хэлдэгээрээ Жудагийн Баярмаа гишүүн хэн нэгний заавар дохиогоор чуулган тасласнаа ам алдчихсан нь энэ.
Харин Сүхбаатар аймгийн Засаг даргыг олон жил хийж явсан, УИХ-д хоёр дахиа сууж, сайд ч хийгээд амжсан Жамбалын Батсуурь УИХ -ын чуулганд дараах үгийг хэлсэн. Тэрээр мөн л Гомбожавын Занданшатарын Засгийн газрыг огцруулахаас зугтсан, бултсан.
УИХ-ын гишүүн Жамбалын Батсуурь:
“Та нарыг алиагаа алдчихсан байхад чинь бид эв зүйг чинь олсон. Унасан дээр чинь дэвсэлбэл дэвслэх байсан. Яалгах гээд байгаа юм тэгээд. Тиймээс дураараа байж болохгүй. Өнөөдрөөс авахуулаад энэ их хурлаа горимонд нь оруул. Засгийн Газрынхаа ажлыг хийлгэ. Төсвөө батлая. Хичнээн өдөр, хичнээн сараар маргасан маргаанаа зогсоож болдоггүй юм уу? А.Ариунзаяа гишүүнээ өөрсдийгөө ч хайрлахгүй, сөрөг намаа ч хайрлахгүй яачихсан улс юм та нар чинь! Одоо боливол яасан юм”.
Аравдугаар сарын 16-нд эхэлсэн Ерөнхий сайд Гомбожавын Занданшатарыг огцруулах УИХ чуулганд ирээгүй гүрийснээ энэ хоёр гишүүн тээр хойно нь Үндсэн хууль зөрчихгүйн тулд гэж тайлбарласан. Харамсалтай нь эдгээр гишүүд тухайн үед Үндсэн Хууль зөрчих эсэхээ ч мэдэхгүй явсан нь егөөтэй. Хэрэв Үндсэн Хуулийг зөрчиж байна гэсэн бол чуулгандаа ирж суугаад Үндсэн Хууль зөрчих гэж байгааг сануулаад ирцээс хасуулаад гарч болно. Эсвэл чуулганы өмнө АН-ын бүлэг хуралдахад энэ асуудлаа тавиад ирцэнд орохгүй гэдгээ мэдэгдэх учиртай байсан. Тэд “Мундсыг нь умдастай нь эргүүлчих гох дэгээнээс гогдуулсан” байсан учраас л чуулганд ирээгүй. Харин энэ өдрүүдэд тэд шагналаа авч буй. Шагнал ч гэж дээ “Муур багшийн үлгэрт гардаг хуруун чинээ шар тос” шахуу.
Ардчилсан Намын гишүүдийг сонгогчид, намынх нь гишүүд, сонгуульд нь ажилласан дэмжигчид нь Харангын “Нарыг хайрла” дуу шиг МАН-ыг “ХАЙРЛА” гэж сонгоогүй байлтай.
