Өнөөдөр УИХ дахь олонхи болсон Монгол Ардын Намын Удирдах Зөвлөлийн хурал болж өнгөрлөө. Уг хурлаар гарсан шийдвэрийн талаар тус намын Ерөнхий нарийн бичгийн дарга Янгуугийн Содбаатар хэвлэл мэдээллийнхэнд мэдээлэл өгсөн.
Тэрээр “Улс төрийн зөвлөл үндсэндээ 5 цаг гаруй хуралдаж хэд хэдэн асуудал ялангуяа намын дотор үүсээд байгаа улстөрийн нөхцөл байдал, бүлэг доторхи хуваагдал, УИХ-ын даргын асуудал, бүлгийн даргын асуудлыг ярилцаад, ажлын хэсэг байгуулах шийдвэр гаргалаа. Ажлын хэсэг асуудлыг 2 хоногт шуурхай авч үзнэ. Бүлгийн хэмжээнд хуваагдаад байгааг нэгтгэж, эв нэгдлээ хангах чиглэлээр тодорхой үүрэг чиглэлийг ажлын хэсэгт өгсөн. Удирдах зөвлөлөөс намын даргаар ажиллаж байсан хүмүүсийг ажлын хэсэгт оруулсан. Ажлын хэсэг хоёр талтай уулзалт хийнэ, тодорхой шийдэл гаргана. Ажлын хэсгийг Сангийн сайд асан Чимэдийн Хүрэлбаатар ахлах бол гишүүдээр Ерөнхий сайд асан Санжаагийн Баяр, Ерөнхийлөгч асан Намбарын Энхбаяр, Хууль зүй, Дотоод Хэргийн сайд асан Цэндийн Нямдорж, УИХ-ын дарга асан Миеэгомбын Энхболд нар багтсан” гэсэн юм.
МАН-ын Ерөнхий нарийн бичгийн дарга Янгуугийн Содбаатарын өгсөн мэдээллээр “Ажлын хэсэг”-т орсон МАН-ын өвгөчүүдийн 2009 оны Ерөнхийлөгчийн сонгуулиас хойш хагарсан, хагарал нь өнөөдрийг хүртэл барьцалдаж хатаж эвлэрээгүй яваа. Тухайлбал 2009 онд Ерөнхийлөгчийн сонгуульд нэр дэвшиж байсан Ерөнхийлөгч асан Намбарын Энхбаярын эсрэг Ерөнхий сайд асан Санжаагийн Баяр, УИХ-ын дарга асан Миеэгомбын Энхболд, Хууль зүй, Дотоод Хэргийн сайд асан Цэндийн Нямдорж нар ажиллаж Ардчилсан Намаас нэр дэвшсэн Цахиагийн Элбэгдоржийг ялуулсан нь эдний хооронд ихээхэн ан цав үүсгэж, арилшгүй мөрөө үлдээсэн .
Өнөөдөр ч Ерөнхийлөгч Ухнаагийн Хүрэлсүхийн хүчтэй дэмжлэгтэйгээр, Ерөнхий сайд Гомбожавын Занданшатарыг ихэд дэмжиж өөртөө үлэмж хэмжээний ашиг унагахаар зүтгэж яваа “Төрийн ордны хэрмэл сүнс” болсон Намбарын Энхбаяртай Цэндийн Нямдорж, Санжаагийн Баяр, Миеэгомбын Энхболд нар эв зүйгээ хэлэлцээд залуучуудаа эвлэрүүлнэ гэдэг "Бухнаас төл авч, сүү цагаатай залгахтай" ижил.
Нийгмийн сүлжээнд Ерөнхий сайд асан Лувсаннамсрайн Оюун-Эрдэнийн талд дуугараад байгаа Санжаагийн Баяр өнөөдөр хэвлэлийнхэнд хоёр талыг эвлэрүүлчих гэж үзсэн чадахгүй байна гэдгээ хүлээн зөвшөөрсөн.
Ядахад ажлын хэсгийн дарга нь “Хотгор шанага” гэх нүүрсний хэргээрээ байнга хэл ам таталж, өнгөрсөн 2024 оны сонгуулиар баруун аймагт Ерөнхий сайд Гомбожавын Занданшатар шиг өвдөг шороодож, нэр нүүрээ барсан Чимэдийн Хүрэлбаатар байгаа нь МАН-ын ахмадууд буюу 60, 70-аад оныхны нөлөө, дэмжлэг өдрөөс өдөрт буурч байгааг илтгэж байна.
УИХ дарга Дашзэвэгийн Амарбаясгалан, Ерөнхий сайд асан Лувсаннамсрайн Оюун-Эрдэнийн талд байгаа залуучуудын бүлгийн хүчний өмнө Ерөнхий сайд Гомбожавын Занданшатар, Ерөнхий нарын бичгийн дарга Янгуугийн Содбаатар нарын дэмжлэг ТЭГ рүү тэмүүлж байна. Тэднийг УИХ-д дэмжиж байгаа 34-ын бүлэгт багтагсад хүртэл улстөрчийн хувьд нэр нүүргүй, нэг их удаан улстөрд оршихгүй нөхдүүд гэж нийгэмд үнэлэгддэг. Ингээд дүгнээд үзвэл ирээдүй нь тодорхойгүй, улстөрч болж чадахгүй гишүүд.
Ядахад тэдний дунд олигтой ЛИДЕР ч алга. "Аргаа барсан хүн аавынхаа толгойг оролдоно" гэдэг шиг залуу гишүүдээ “Ална, тална, аятайхан байгаарай, харуулнаа чамд” энэ тэр гээд буурал толгойлчихоод орилж явахаар хэн тэдэнтэй эвлэрэх вэ?
Үнэндээ Ерөнхийлөгч Ухнаагийн Хүрэлсүхийн жагсаалтаар Дашзэвэгийн Амарбаясгалан, Лувсаннамсрайн Оюун-Эрдэнэ нарын хүчээр УИХ-д сандалтай болсон нөхдүүдэд цаашдын улстөр үгүй болсон. Үүнийг ганц харж чадсан нь Монгол Улсын шадар сайд Сайнбуянгийн Амарсайхан байж нүүдлийг зөв хийж засгаас хөөгдөх дээрээ тулж байгаа ч 34-ын бүлгийн МАН-гаруудыг бодвол илүү холыг бэлчээж байж магад.
Тиймдээ ч өнөөдөр ялагдсан мэт харагдаад байгаа Дашзэвэгийн Амарбаясгалан, Лувсаннамсрайн Оюун-Эрдэнэгүйгээр МАН цааш цаашдын сонгуульд ялахгүй гэдэг нь тодорхой. Тэднийг л МАН-аас явуулж чадвал АН-ынханд ихээхэн ашигтай тул тэд нийгмийн сүлжээгээр Дашзэвэгийн Амарбаясгалан шиг муу хүн энэ хорвоод үгүй мэт харлуулж байна.
Тиймээс л өнөөдөр Янгуугийн Содбаатарын суудалдаа үлдэх ганц боломж, Гомбожавын Занданшатарын Ерөнхий сайд хамгийн богино хугацаанд хийсэн гэж нүдний булай болохгүй цаг хугацаа. Ерөнхийлөгч Ухнаагийн Хүрэлсүхийн 2027 онд Ерөнхийлөгчөөр өөрийн хүнээ тавиулах хүсэл тачаалын гол зангилааг ганц далайлтаар тайлах хүн нь Дашзэвэгийн Амарбаясгалан болчихоод байгааг гэнэт санаж, одоо Дашзэвэг гуайн хүүд АЮУШ хадаг ах нараараа ар араас нь бариулж гуйх цаг нь ирснийг тэд ойлгосон.
Үндсэн Хуулийн Цэцийг лобиддож байж залуучуудын бүлгээ дарж авсан МАН-ын одоогийн ахмадууд намаа бүр бутаргачихгүйхэн 2027 оны сонгуульд орохын тулд залуучуудын бүлэгтээ хөгшчүүдээрээ зуучлуулан эвлэрэх хүсэлт тавьж байна.
Эвлэрүүлэх ажлын хэсэгт орсон хөгшчүүд нь намаа яаж хагалахыг цагтаа яруу тодоор үзүүлсэн нөхдүүд.
Ардын болтлоо ард түмний сэтгэлд хоногшсон нэгэн дууны үгийг санагдуулам.
Завсар орсон хоёр сэтгэлийг болбол
Загасны цавуугаар наалтай нь биш дээ амраг минь ээ
гэдэг шиг. МАН-ын ахмадуудын тарьсан хуваагдлыг хөгшчүүл нь зуучилж, залуус эвийн цавуу шиг наалдана гэж ёстой юу л бол. Энэхүү ажлын хэсэг хуваагдлыг эвлэрүүлж, залуус нь ахмадуудтайгаа хамтарна гэвэл араасаа хутга дүрүүлнэ гэдэг болохвий. МАН-ыг 8 сонгуульд ялуулж, МАН-ын гишүүдийн амьдралыг сайн, муу хэлүүлэн өнгөтэй өөдтэй авч явсан нам дотроо битгий хэл сөрөг хүчиндээ ч СТРАТЕГИЧ гэж хүндлэгддэг Дашзэвэгийн Амарбаясгалан Ерөнхий сайд Гомбожавын Занданшатар, Ерөнхий нарийн бичгийн дарга Янгуугийн Содбаатар мэтийн хөнгөн залинд арай ч хууртахгүй биз ээ.
Дашзэвэгийн Амарбаясгалан бол МАН-тай МАН-гүй хүчтэй ЛИДЕР улстөрч болж гарч ирж байна. Харин Дашзэвэгийн Амарбаясгалангүй МАН бол 2027, 2028 онд цөөнх цааш үргэлжилбэл 2032 онд ч цөөнх тэгээд цаашаа улс төрөөс арчигдана.
